Үндістанның Атқарушы дирекциясы (ED) Махараштра штатында ықтимал криптовалюта алаяқтық әрекетіне қарсы күрес жүргізіп, нәтижесінде инвесторлар 4,25 крор рупийден (шамамен 472 000 доллардан) астам шығынға ұшырады.
Агенттік ақша жылыстатуға жол бермеу туралы заңға (PMLA), 2002 сәйкес 7 қаңтар күні Нагпур қаласындағы үш жерде тексеру жүргізді.
Үндістанның ED «Ether Trade Asia»-ға қатысты крипто алаяқтықты тергеу жүргізіп жатыр
Баспасөз хабарламасына сәйкес, бұл орындар Nished Mahadeo Rao Wasnik және оның серіктестерімен байланысты болған. ED Wasnik басқаратын топ заңсыз жұмыс істеген «Ether Trade Asia» деп аталатын онлайн платформаны басқарды деп түсіндірді.
Тергеушілердің айтуынша, топ Нагпур мен Махараштраның басқа аймақтарындағы премиум қонақүйлерде жарнамалық семинарлар ұйымдастырған. Бұл іс-шаралар кезінде ұйымдастырушылар қатысушыларға инвестициялық мүмкіндіктер туралы жаңылыстыратын мәлімдемелер жасаған. ED бұл шаралар күнәсіз инвесторларды алдау мақсатында өткізілгенін мәлімдеді.
«Олар Ether Trade Asia платформасын ойдан шығарылған екі жақты комиссиялау схемасымен жобалап, жаңылтатын жалған уәделер ұсынған және өз фирмасы M/s Ether Trade Asia аясында әртүрлі схемалар арқылы ‘Ethereum’ криптовалютасына инвестициялайтын боласыз деп иландырып, аңқау инвесторларды өте жоғары қайтарым уәдесімен тартқан. Осылайша халықтан қомақты қаражат жинап алған» делінген баспасөз хабарламасында.
Агенттіктің мәлімдеуінше, топ жиналған қаражатты өз пайдаларына жұмсаған. ED бағалауы бойынша, инвесторлардың шығысы 4,25 крор рупийден асады. Тергеу сонымен қатар айыпталушылар осы қаражатты жылжымалы және жылжымайтын мүліктер сатып алуға жұмсағанын анықтады. Мұндай мүліктер олардың тікелей атына немесе отбасы мүшелерінің және өздерінің бақылауындағы компанияларының атына рәсімделген.
Сонымен бірге, билік Wasnik және оның серіктестері қаражаттың бір бөлігін криптовалюта сатып алуға жұмсағанын айтты. Айыпталушылар жеке әмияндарына жасырын түрде жинаған. ED соңғы тексеру кезінде айғақты құжаттар мен цифрлық құрылғыларды тәркіледі деп хабарлады.
ED 20 лакх рупийден (шамамен 22 000 доллардан) астам сомадағы банк шотындағы қалдықты және шамамен 43 лакх рупий (шамамен 51 000 доллар) цифрлық активтер сақталған жеке әмиянды бұғаттады. Бұдан бөлек, билік бірнеше жылжымайтын мүлікті, солардың ішінде айыпталушылар сатып алған бенами деп аталатын бірнеше крор рупийлік жылжымайтын мүлікті анықтады.
Бенами мүлік – атауы біреудің атына рәсімделген, бірақ ақысын төлеген әрі іс жүзінде басқаратын адам басқа болатын мүлік. Бұлай істеудің мақсаты – нақты иесінің жеке басын жасыру. Терминнің түп тамыры хиндиден: «benami» – «атсыз» деген мағына береді.
Сонымен қатар, ED Чандигархтағы бөлек жер алаяқтық ісінде 4,79 крор рупий (шамамен 530 000 доллар) тұратын криптовалюталарды бұғаттады. Екі тергеу де жалғасуда.
Тергеулер Үндістандағы криптовалютаға қатысты алаяқтық пен қарымта схемаларға қарсы кең ауқымды күш қолдану әрекеттерімен үйлеседі. Желтоқсан айында билік жалған криптовалютаға негізделген ауқымды Понзи және көп деңгейлі маркетинг (MLM) схемасын жойды. Бұл операция жүз мыңдаған инвесторларды алдап, 254 млн доллар шығын келтірді.
Атқарушы дирекция (ED) сонымен қатар Махараштра, Карнатака және Дели аймақтарында 21 жерде тінту жүргізді. Бұл рейдтерге тағы бір криптоға қатысты MLM алаяқтық, он жылға жуық уақыт бойы жұмыс істеген жүйе нысан болған.
